Ignotus artifex Banksy cognominatus novum opus exposuit apud aditum sui deversorii, cui nomen est“Muro divisum”, ab anno MMXVII patentis, Bethlehem in regione Cis Iordanem contra murum aedificatum ab Israel ut oppidum Palaestinum ex Hierusalem orientali separaretur. Id constat ex consueto praesepi cum Sacra Familia: Virgo, Infans Iesus et Sanctus Iosephus a retro collustrati sunt et muro admoti pertuso pyrobolo quo foramen effectum imaginem cometae sumit. Nam opus recte “Cicatrix Bethlehem” inscribitur. In muro verba scripta sunt ad bonum propensa, velut caritatem, pacem, libertatem. Proprium est huius artificis opus creare in loco ad rem pertinenti.

Quid aptius ad fingendum praesepe violatum quam murus apud Bethlehem?

Scripsit Lydia Ariminensis