Pontificem Auschwitz campos captivitatis visitare

Pontifex Romanus Benedictus XVI campos captivitatis apud vicos Polonos Auschwitz et Birkenau visitare constituit: haec fuit illi mansio suprema primum per Poloniam iter facienti. Qui pedibus celebres cancellos quibus inscribitur "laborem liberare" (ut in imagine aspicis) transire voluit, qua centena millia miserorum, plerumque Iudaeorum, immani et saevae morti appropinquare coeperunt. Ibi convenit pontifex, ut filius Germani populi - ita se ipsum appellavit -, ante Auschwitz suppliciorum murum cum aliquot hominibus qui viventes inde superfuerunt, orationes Deo elaturus. Deinde cellas gasificationis Birkenau visitavit, ubi "mihi huc erat veniendum, - inquit - meum est successoris Iohannis Pauli II et filii Germani populi, coram veritate et iure omnium qui hic passi sunt, coram Deo ipso". Ibi sermonem habuit, quo impietatem nazistarum aperte denuntiavit, postquam ipsum cubiculum vidit ubi presbyterus catholicus Maximilianus Kolbe mortem obiit, suam vitam pro captivo quodam patre familias offerens. Nuntius pontificis Ioachim Navarro-Valls patefecit visitationem camporum minime propositam esse, sed ipsum Benedictum confirmavisse "se Auschwitz se non conferre nequire". Adolescens Iosephus Ratzinger socius Iuventae nazisticae fuit; nec defuerunt qui censuerint minime oportunum esse iterum in locis illis quendam Germane loqui.

Antequam campos internecionis visitaret, allocutus erat pontifex fideles Wadovice (ubi Iohannes Paulus II ortus est) et Cracoviae.

Scripsit Herimannus Novocomensis