De cannabis usu contentio internationalis

Crescit contentio inter regiones limitales Belgiae et Hollandiae de usu marihuanae - nuntiat scriptor epistularius actorum diurnorum Polonorum "Gazeta Wyborcza" Jacek Pawlicki.

14 annos post pactum Unionis Europaeae hic firmatum, denuo de urbe Maastricht Batavorum latius auditur, nam in hanc urbem proximam Belgiis, Gallis et Germanis turbae peregrinatorum unoquoque die veniunt, ut fumando cannabim Indicam in tabernis coffeariis aut sub Iove sine metu biocolytarum fruantur. Est Holandia enim sola in Europa (nisi in orbe?) terra, ubi hoc psychotropico molli lege uti licet. Fessus turbarum talium peregrinatorum burgimagister Maastricht Geerd Leers modo decrevit partem 16 tabernarum licentiam marihuanam praebendi possidentium in suburbia movendas. Et hic difficultas, nam haec suburbia 400 tantum metris a fine Belgico posita sint, at Belgae vehementer contra usum publicum cannabis pugnant. Biocolytae oppidorum Belgicorum (seu potius Flandricorum) Smeermass et Tongeren minantur se cameris homines in tabernis fumantes lustraturos et, si hi casu limitem terrae postea transiverint, eos statim apprehensuros necnon in vincula iacturos.

Rumor fert de hac re hodie, die scilicet Corporis Christi, ministri primarii Belgiae (Guy Verhofstadt) et Hollandiae (Jan Peter Balkenende) locuturi sunt "privatim" tempore sessionis moderatorum regiminum terrarum Unionis Europaeae Bruxellis habendae.

In photographemate vides, lector care, in coffeo Maastrichensi sedentem viatricem Gallicam fumum marihuanae haurientem necnon astynomum Batavum potione cocae fruentem.

Scripsit Krakauer