Annus
2 0 0 6


De lege suprema Europaea iterum conficienda

De Consilio Europaeo, quod Bruxellis congregatum est

Rectores Unionis Europaeae de lege suprema Bruxellis acriter disserunt, quam congregationis a Valerio Giscard d'Estaing conductae operam suffragiis anno praeterito habitis Francogalli et Batavi inopinate reiecerunt: sunt qui legem summam in perpetuum humari malint.

Praeter hoc, moderatores et Romaniam et Bulgariam urgent, ut anno proximo Unionem ineundo paratae sint, atque Sloveniam eurone a Kalendis Ianuariis usuram esse definite constituerunt. De ulterioribus civitatibus in Unionem accipiendis, Collegio Europaeo mandaverunt, ut accurate de facultate alios populos abhinc adsorbendi referant: ceterum praesidens Collegii Manuel Barroso Lusitanus Turciae initum appellavit "et Turcis maxime arduum et nobis, qui parati esse tantae nationi accipiendae debeamus, quam multi nimis dissimilem a pleraque Europa faciant."

Minister primarius Britannicus Antonius Blair biennio opus esse putat, ut fides concivium restituatur. Quos velle dixit Europam de pane cotidiano de rebus oeconomicis de haud legitima immigratione de securitate agentem, cum autem res felicius se habere viderint, tum suffragiis ad instituta Europae renovanda libenter consensum suum laturos esse.

Scripsit Herimannus Novocomensis



Retro ad:

Novissima editio
Summum paginae