Annus
2 0 0 6


Abas militem Israelianum iam iam liberatum iri putat

Abas militem Israelianum iam iam liberatum iri putat

Hac feria Iovis colloquio Romae cum Primario Ministro Romano Prodi primum, deinde cum diurnariis sermone habito, Mahmud Abas Palestinorum princeps (quem in imagine aspicis) affirmavit Israelianum militem, nomine Gilad Shalit, unum abhinc mensem a catervis Palestinis retentum, “propediem liberari posse”. “Utique spero eum (militem) valere ac brevi tempore domum regredi posse. Itemque eos 10.000 homines Palestinos ab Israelitis captos eodem beneficio (adceleratae libertatis) donandos esse”.

Interim Israeliani exercitus copiae in Zonam Gazae facta incursione tres homines Naplusae necasse nuntiantur. Gregis illius radicalis Hamas, qui eorum rem publicam administrat, capita quaeruntur, sedesque Auctoritatis Palestinae tribus diebus inlato impetu corrumpuntur.

Scripsit Carolus Petreius



Retro ad:

Novissima editio
Summum paginae