Berolini cinaedos pompam egisse

Temperaturis 30 fere graduum d.22. m.Iul. a.2008 aliquot centum milia cinaedorum tribadumque celebraverunt Diem Christophori Vialem. Verbis promulgatis, quae sunt „Varietas et ius et libertas“ participes pompae, qui partim erant vestibus versicoloribus induti, per urbem pervagati sunt.

Berolino ex urbe – Die Christophori Viali Berolinensi, quo fit pompa cinaedorum tribadumque more tradita, hoc quoque anno allecti sunt complura centum milia visitatorum. Hoc enuntiaverunt pompae dispositores numero primum aestimato. Astynomi autem noluerunt aestimare numerum visitatorum.

Carrucis ornatis, modis musicis bombizantibus, turturillis more insolitissimo vestitis comitantibus ex horis meridianis caravana diversicolor ab Aggere Electoris iter fecit ad Columnam Victorialem. Ibi vespere fiet declaratio finalis, in qua oratio habebitur a Nicolao Wowereit Berolini burgimagistro (qui est partis sociali-democraticae). Idem burgimagister in curru partis sociali-democraticae stans pompae particeps commendavit hominibus, ut patientius tolerarent cinaedos. Necnon manifestationis particeps fuit eiusdem competitor partis christiano-democraticae, cui nomen est Friedbertus Pflüger.

Volcerus Beck, Prasinorum dispensator, qui praemio honestatus est fortitudinis civilis illius pompae Berolinensis, postulavit, ut tribadibus cinaedisque in Germaniâ concedantur aequa iura ac ceteris hominibus. Quod consortibus homosexualibus essent quidem omnia officia coniugalia, sed iidem iure vectigalium et officialium curatione pergerent discriminari, esse scandalon. Rigâ in urbe Lettoniae principe idem Volcerus postulavit, ut gubernatores Germaniae foederales magis conferrent ad iura humana tribadum cinaedorumque tutanda.

Die Christophori Viali (CSD) cinaedi tribadesque quotannis commonefaciunt, quod m.Iun. a.1969 Novi Eboraci astynomi fecerunt impetûs violentos in scaenam (qualis dicitur) cinaedorum. Dispensatores dicunt eandem pompam Berolinensem esse unam ex manifestationibus cinaedo-tribadicis Europae maximis. Die Saturni hanc pompam custodiverunt ducenti quinquaginta astyphylaces.

Hanc relationem d. 22. m.Iul. a.2006 in periodico „Der Spiegel“ inventam e Theodisco sermone in Latinum convertit Nicolaus Groß praeceptor Sedis interretialis domûsque editoriae, quae appellatur LEO LATINUS: http://www.leolatinus.com/

Scripsit Nicolaus Gross