6hp75
 De poenis in Coream borealem
Consilium securitatis ONUs communi sententia deliberavit
Coream septemtrionalem propter experimentum nuclearem praeterita
septimana confectum poenis afficiendam esse, levioribus tamen
quam antea a legatis USAe propositis. Ex Corea boreali petit
consilium, ut omnia arma nuclearia destruat, "quod
experimentum atomicum paci et securitati mundanae aperte
minitetur"; nullum tamen factum bellicosum promittitur,
legatorum Russorum et Sinensium voluntatibus obsecundatis.
Pyongyang regimini arma tantum maioris pretii, verbi gratia
currus et naves et a๋ria vehicula bellica itemque missilia et
merces sumptuosas, vendere cuiquam non licebit; de armis contra
minoris pretii omnibusqueque ad vitam necessariis nullae
condiciones impositae sunt. Quindecim consilii civitates
"exquirunt" ex communitate mundana, ut omnes merces in
Coream borealem illatae aut inde evectae recognoscantur, cum ab
USA verbum "constituunt" antescriptum esset.
Acerbis verbis respondit legatus boreae Coreae, consilium
securitatis instar gregalis latronis se gessisse patriamque suam
deliberationem omnino reicere.
Scripsit Herimannus Novocomensis
|
