Annus
2 0 0 6


Russia denies poisoned spy claims

De investigatore Russo venenato

Insanam appellaverunt moderatores Russi opinionem, Alexandrum Litvinenko investigatorem Londinii ut Britannicum civem vitam agentem, qui antea operam suam in instituto Russico occultis investigationibus addicto FSB dederat, thallio voluntate instituti eiusdem venenatum esse. Alexander Litvinenko, cuius sani imaginem hic aspicere potes, de diurnariae Annae Politkovskaya nece indagare nuper coeperat, armis igneis Mosquae mense Octobri occisae dum de sceleribus a copiis Russis in Cecenia perpetratis investigat. Ante annos duos pyrobolum viri domum adversus deiectum erat. Indagatores Britannici morbum deliberati veneficii effectum reputant, neque certum esse Alexandrum Litvinenko superstitem fore.

Qui, cum diurnariis retis televisifici BBC ante septimanas duas colloquens, se cum ignoto viro conventurum esse praenuntiaverat ut in caupona quodam Londiniensi de novis factis ab ipso certior fieret: sibi chartas donatas esse ubi plurima nomina inscripta erant, paulo post se aegrotare coepisse, medicos se letali vi thallii venenatum comperisse. Cuius metalli salibus saporis colorisque expertibus mures necari solebantur.

Scripsit Herimannus Novocomensis



Retro ad:

Novissima editio
Summum paginae