Evum Morales, Indum Americae, praesidentem Boliviae factum esse

Evus Morales primus Americae meridionalis indigena praesidens factus est: die XVIII enim mensis Decembris comitia habita sunt, quae Evo Morales quattuor et quinquaginta centesimas consensuum dederunt; victus est Georgius Tuto Quiroga, qui factioni dexterae praeest. In senatu inferiore parti socialisticae, quam Evus Morales ducit, pars maior sellarum attributa est.

Evus Morales sermonem post suffragia habuit: se ad aequitatem iustitiam pacem obtinendas contra nimiam libertatem mercaturae acturum esse, legem supremam rei publicae ita mutandam esse, ut magis agnoscantur iura indigenarum, qui maior pars civium Boliviae sunt, pecuniam ex ditioribus civitatibus in patria sua occupandam esse: de hoc magni momenti reputatur consilium novi praesidis non intermittendi iam coeptam auctionem ad magnam ferri fodinam apud fines Brasilianos effodiendam.

Multi novo praesidi adversabuntur: domini maximarum officinarum in regionibus orientalibus sitis, societates petroleo et methano extrahendis deditae, moderatores USAe. Nam Evus Morales promisit amplissimas fodinas methani re publica acquisitum iri, se autem cocae (Erythroxylon coca) culturae fauturum esse, ut medicamenta pretiosa producantur, neque mercaturam illiciti pharmaci inde creati, quod cocainum appellatur, toleraturum esse. Quod rectoribus USAe minime gratum fore creditur, qui plantationes cocae in Bolivia iam diu eradicare constituerunt, venena ad hoc copiose dispergentes. Si ergo praeses nuper creatus in fide manserit, Bolivia probabiliter adiutoria USAe et argentariae mundanae amissurus est et occupatio pecuniae methani mercatorum in alias civitates emigrabit.

Die XXII mensis Ianuarii MMVI celebrabitur initium muneris Evi Morales: ceteri praesides America meridionalis et legati gregum civilium Boliviae invitabuntur.

Scripsit Herimannus Novocomensis