Annus
2 0 0 6


69

De cruore in Aegypto effuso

Viginti aut plures homines perierunt Memphide, in capite Aegypti, postquam custodes publici impetum fecerunt contra inermes profugos Sudanenses apud aedificium Ordinis Nationum Unitarum.

Mense Septembri declinante circiter tria milia civium Sudanensium, qui a patria sua bello furente in Aegyptum confugerant, in horto publico apud meschitam reclamaverunt ibique usque ad hunc diem permanserunt, postulantes ab instituto pro exulibus Ordinis Nationum Unitarum (UNHCR) ut in aliam civitatem eveherentur, meliorem vitam optantes. Misere et insalubriter sub divo vitam egerunt. Die XXX mensis Decembri multo mane miserunt auctoritates amplas autoraedas et quinque milia militum, ut omnes alio etiam vi tranferrent. Ad iussa perficienda primum aquam salientem in profugos etiam orantes, ut mos est Muslimis Veneris die (ut in imagine aspicitur), proiecerunt; deinde in turbam inermem fustibus et scutulis impetum fecerunt: viginti exules, quorum nonnulli pueri, vitam sic amiserunt, custodes publici et nonnulli Sudanenses vulnerati sunt.

Ordo Nationum Unitarum rectores Aegyptios de caede accusaverunt, qui se voluntatem legati Sudaniae observasse adfirmant: nam moderatores Sudanenses exules diffidentes invitaverunt, ut domum redirent, quod pax confecta esset. "Perturbatus et tristis sum ob cruentam caedem - inquit legatus Ordinis Nationum Unitarum pro profugis tutandis - sed nullo modo quod evenit excusari poterit". Sed monendum est difficultates tum ortas esse, cum ONU victum nonnullis praebere desiit, quod condicio exulis attributa non esset.

Scripsit Herimannus Novocomensis



Retro ad:

Novissima editio
Summum paginae