Annus
2 0 0 6


d

SCANDALON INVESTIGATIONIS SCIENTIFICAE

Hwang Woo Suk clonurgum celebratissimum esse fraudatorem

Nunc scandalon etiam officialiter est perfectum: Hwang Woo Suk clonurgus Austrocoreanus investigationem suam ex integro falsavit. Universitas Seulensis rettulit Hwangium reverâ fabricasse ne ullam quidem cellulam primordialem homini accommodatam.


Hwang pseudo-clonurgus: a quo fabricatam esse ne ullam quidem cellu-lam primordialem accommodatam

Seulo ex urbe – Officialis Commissio Seulensis Universitatis Nationalis hodie diurnarios certiores fecit se acido disoxyribonucleinico perquisito invenisse nullam ex illis lineis cellularum primordialium a Hwang eiusque grege exhibitis exortam esse clonizando. Postquam septimana proxima praeterita inventum est data laboratrinalia novem linearum esse falsata, commissio nunc affirmavit etiam reliquas duas lineas cellularum primordialium exortas esse ex ovulis fecundatis neque certis hominibus patientibus accommodatas. Haec relata sunt a Roh Jung Hye decanus universitatis investigatorius. Iam nonnullis diebus ante Yonhap agentura nuntiorum enuntiaverat relationem Hwangianam non solum partim, sed ex integro esse falsatam.

Commissio rettulit relationem Hwangianam m.Maio in illustri periodico Americano, c.t. "Science", publicatam non solum continere quaedam menda, sed de industria esse falsatam. Hwang, qui interim ab officio suo professorali est remotus, affirmaverat se primum fabricasse undecim cellulas primordiales hominibus patientibus accommodatas. At photographematis cellularum primordialium inter se comparatis inventum esse compluribus imaginibus easdem acidi disoxyribonucleinici sequentias exhiberi.

Relatione Hwangianâ publicatâ magnae spes conceptae erant de clonizatione therapeutica. Clonurgos speraverant cellulis primordialibus adhibitis curari posse morbos graves, qualis est Parkinsonianus. Praeterea cellulae primordiales singulis hominibus aegrotis accommodatae eo essent aptissimae, quod non arcerentur systemate immunitatis.

Interim in dubium vocata sunt etiam cetera opera istius pseudo-clonurgi. Idem a. 2004 exhibuerat primas embryonales cellulas primordiales clonizatas, a.2005 primum canem clonizatum, cui nomen est Snuppy. Qui canis afghanianus a Hwang contenditur creatus esse eâdem ratione clonurgicâ, qua iam a.1996 creata sit Dolly ovis clonizata.

Hanc relationem d. 29. m.Dec. a.2005 in periodico „Der Spiegel" inventam e Theodisco sermone in Latinum convertit Nicolaus Groß praeceptor Sedis interretialis domûsque editoriae, quae appellatur LEO LATINUS: ///www.leolatinus.com/

Scripsit Nicolaus Gross



Retro ad:

Novissima editio
Summum paginae