Annus
2 0 0 6


98

Milosevic cordis ictu periisse (re vera?)

Rumores ex tribunali mundano Hagae die Solis rettulerunt Slobodan Milosevic, quondam praesidem Jugoslaviae, cordis ictu vitam in vinculis amisisse: cuius cadaver, praesentibus nonnullis medicis a mortui propinquis necnon a rectoribus Serbiae missis, accurate examinaverant eodem die medici Batavi, quibus iudices tribunalis mundani munus causam subitae mortis investigandi mandaverant. Ita cognitum est reum neque suapte neque cuiuslibet manu periisse: quod nonnulli suspicati erant, postquam rete televisificum Batavum indicaverat medicamenta alia, atque illa quae ipsi praescripta erant, mense Ianuario in cella captivi inventa esse, idemque sanguinis Milosevic examinatores comperisse.

At Milosevic patronus Francogallicus Iacobus Vergès, a diurnario retis televisifici TF1 interrogatus, tribunal Hagense "interfectorem" appellavit: cum rei culpam comprobare non possent, inquisitores eius mortem ante sententiam vehementer optavisse ideoque aegrotanti captivo facultatem curationes et remedia libere eligendi denegavisse, gravitatem morbi increscentes. Zdenko Tomanovic, cuius consiliis Milosevic utebatur, iam litteris moderatoribus Russiae denuntiaverat pharmaca leprae et tubercolosi medendo apta inopinate captivo comparata esse, ut toxicis assumptis interiret. Denique Leo Bokeria, medicus Russus sanguinis cursus morborum peritus, cuius curationes Milosevic denegatae erant, suspicatus est nullum medicamentum ab ipso adsumptum esse, ne veneno interficeretur.

Iudex requirens Tribunalis Hagensis, Helvetica Carola Del Ponte, nullius culpae sibi consciam esse confirmavit: medicamenta reo cotidie a custodibus tradita esse, quorum officium non erat vigilare, utrum recte assumerentur an non, .

Duae inquisitiones de morte Milosevic coeptae sunt, altera a tribunali mundano, altera ab investigatoribus Batavis.

Scripsit Herimannus Novocomensis



Retro ad:

Novissima editio
Summum paginae