Annus
2 0 0 6


23

IN CHINÂ PRIMUM PUBLICÊ TRACTARI HOMOSEXUALITATEM

In cinaedorum thermopolio facta esse studia scientifica
Scripsit Jens Radü


Usque ad annum 2001 in Chinâ homosexualitas officialiter habita est pro insaniâ, nunc haec res antea nefanda incepta est publicê tractari. Revolutione Chinae sexuali commoventur almae matres: In Universitate Shanghaiensi incohabitur primus cursus institutorius cultûs cinaedorum civilis. Qui erit frequentatissimus.


Condomium giganteum (in urbe Shanghai constitutum): Iuvenes resistere pudicitiae socialistarum immodicae

Professoris Sun Zhongxin (quem Latinê dicamus Sunum) disciplina specialis est investigatio sexualis. Studentes autem animos maximê attendunt, quandocumque idem professor scholam habens academicam venit ad capitulum tractandum, c.t. „homosexualitas". „Mox" inquit, „animadverti quam vehementer studentes cuperent audire de hôc themate". His ferê verbis Professor Sunus refert in actis diurnis Sinicis, c.t "Shanghai Daily".

Hac experientiâ adductus professor proximo semestri futuro in Shanghaiensi Universitate Fudanâ bene famatâ habebit proprium cursum institutorium, qui inscribitur: "Homosexualitas cinaedorumque cultus civilis". Seminarium iam nunc est frequentatum ultra numerum clausum: Iam complures centuriae studentium petiverunt 100 locos, qui occupari possunt.

Quo seminario habendo Sunus id praecipuê studet, ut deminuat studentium ignorantiam opinionesque praeiudicatas ad homosexualitatem spectantes. Talia autem studia in re publicâ populari Sinicâ sunt omnino nova. Haec effecta esse videntur verecundâ quadam revolutione sexuali, quae ex annis nonagenariis in Chinâ percrebrescit. At imprimis universitates diu habebantur pro pudicitiae immodicae propugnaculis.


Ante examina venerem esse prohibitam

Paucis demum mensibus ante studentissis studentibusque permissum est, ut conubia facerent ante examina superata. Scilicet etiam venerem ante examen vetitam fuisse. Si quis ante diploma deprehendebatur lusui veneris indulgens, eidem imminebat exmatriculatio. Necnon in Diem Disimmunitidis Mundanum proximo mense Decembri praeterito factum Universitas Pechinensis, qua est morum severitate, interdixit, ne in campo academico distribuerentur *condomia gratuita.

At quodam ex spatio temporis alumni academici resistunt sociis nimium pudicis et moribus veneris obsoletis. Iam sublata est probitio connubii ante examina facti, sed homosexualitas in societate Sinensium adhuc est res ineffabilis. Hoc mirum est, quia amor in proprium sexum directus aetate magnarum Chinae dynastiarum ante annum 1911 longê latêque patuerat. "Commercia venerea inter viros iuxta conubia habita erant perquam communia", Mechthildis Leutner, sinologa Liberae Universitatis Berolinensis, dixit diurnariis periodici SPIEGEL ONLINE. Quod apparet etiam ex magnâ nominum multiplicitate, quae in vetere Sinensium sermone imposita sunt veneri aversae: Amor homosexualis appellabatur "cupiditas manicae desectae" aut "mâlum Persicum divisum".


Studentes Sinenses: motores revolutionis sexualis

Leutner explicat: "Dummodo prolis propagatio et existentia familiae erant confirmatae, in societate Sinicâ sine ullâ difficultate comprobabantur uxores secundariae necnon commercia homosexualia". At in hodiernâ societate Chinae communisticâ paucissimi cinaedi et tribades audent confiteri se venere coniunctos esse cum homine proprii sexûs.

Plus 90% (nonagenae centesimae) Sinensium homosexualium vivunt uxorati, ut veram suam inclinationem celarent. Qui ut mulieres ducant urgentur ab amicis, vicinis, collegis professionalibus. Scientistae aliquatenus aestimant circiter 7% (septenas centenas) 1,3 (unius-virgula-trium) miliardarum Sinensium esse homosexuales.

Tamen lêges partis communisticae rigidae annis praeteritis aliquatenus sunt emollitae.

Ex a.1997 pêdicatio vĭrorum non iam lêge punitur, ex a.2001 homosexualitas non iam habetur pro insaniâ. Revolutione a.1949 factâ communistae homines homosexuales tamquam symbola mundi occidentalis depravati crudeliter persecuti erant.

Illuminatione impugnari disimmunitidem

At interea primi praenuntii sodalitatis cinaedorum Sinensium surripuerunt ipsam notionem partis communisticae fundamentalem: "Tongzhi" (socius) inter Sinenses cinaedos iam facta est appellatio blanda. Urbes Shanghai et Beijing (Pechinum) in parte terrae orientali urbibus insigni sunt centra motionis cinaedicae. Illo seminario in Universitate Fudanâ habendo manifestatur interim etiam almas matres commotas esse revolutione sexuali.

In illo cursu institutorio nonnullas acroases faciet etiam Professor Gao Yanning, qui est particeps institutis valetudinis popularis. Idem medicus iam ante duos annos seminarium habuit de disimmunitide et homosexualitate. Titulus eiusdem fuit: „Homosexualis valetudo, societas, scientia". Iam illo tempore idem scientista alumnos docens ingressus erat vias omnino novas et inauditas.

CHINA: IUVENES RESISTERE RUSSATAE VENERIS SUPPRESSIONI

Itaque in acroasibus professores variarum disciplinarum docuerunt de homosexualitate, sed ad programma institutionis pertinuerunt etiam studia scientifica in quodam cinaedorum thermopolio facta. Professor autem Qin Shide, qui docere solet in Universitate Qingdao, tum rettulit, quomodo ipsemet aliis patefecisset suam propriam homosexualitatem. Oratione, quam idem professor per duas horas habuit de periculo disimmunitidis et de zonîs vĭrorum erogenîs et de masturbatione, factum est, ut nonnulli studentes vehementissimê erubescerent.

At unum ex Chinae problematîs urgentissimis est ratio efficax disimmunitidis evitandae. Quod non fieri potest nisi iuvenes quam accuratissimê instituuntur de hôc morbo contagiosissimo. In Conventu Disimmunitidis Mundano Bangcociensi periti monuerunt solâ in Chinâ numerus morbo infectorum usque ad annum 2010 posse augeri ad decem miliones. Istac pandemiâ scilicet augeantur opiniones de homosexualibus praeiudicatae. "Nos quidem efficiemus, ut studentes iustius iudicent de homosexualibus et speramus eo sublatum iri talium hominum contemptum atque neglectionem". Sic dicit Gao, qui in cursu suo universitario impugnare vult ignorantiam in societate Sinicâ longê latêque patentem.

Sed iidem academici si seminarium praeparant litteras quaerentes quodammodo terram ingrediuntur incognitam. Nam in Chinâ opera ad homosexualitem spectantia sunt rara, deest liber didacticus ad scholas academicas aptus. Adhuc deest.


Hanc relationem d. 23. m.Aug. a.2005 in periodico „Der Spiegel" inventam e Theodisco sermone in Latinum convertit Nicolaus Groß praeceptor Sedis interretialis domûsque editoriae, quae appellatur LEO LATINUS: http://www.leolatinus.com/

Scripsit Nicolaus Gross



Retro ad:

Novissima editio
Summum paginae