Olympia Augustam Taurinorum ~ ignem Olympium in itinere esse

Olympiae Theodora Siarku actrix Graeca die Solis facem inflammavit, quacum ignis Olympius Augustam Taurinorum deferratur. Hac enim in urbe ludi Olympii hiemales a die decimo usque ad diem vicesimum sextum mensis Februarii anni sequentis locum habebunt. Etsi ignis illo ipso die propter iniquitatem caeli more tradito radiis solis accendi non potuit, tamen bene provisum erat: Nam die Iovis, cum actores rem ultimum temptabant, ignis more tradito accensus est et usque ad diem Solis in templo Iunonis conservata est, si quid accideret.

Olympia fax primum a 534 cursoribus 2006 chilometra per Graeciam feretur, donec die sexto mensis Decembris in stadio Panathenaico Herodis Attici Athenis, ubi anno 1896 primi ludi Olympii recentes acti sunt, ad Valentinum Castellanum praesidem officii Olympii Taurinensis deferatur. Inde aeroplano Romam vehetur, ubi Carolus Azeglius Ciampi praeses Reipublicae Italicae eam per provincias Italicas ferri iubebit. In prima statione, quae est civitas Vaticana, Benedictus XVI. papa ignem benedicet. Inde 11000 chilometra et 64 dies per totam Italiam Augustam Taurinorum feretur. Quo in itinere, quod omnia fere monumenta maioris momenti, velut theatrum antiquum Tauromenitanum Siciliae, forum matronae Florentinum, turris obliqua Pisana, canalis grandis Venetica, tanget, corda Italorum ceterorumque gentium ardore Olympio impleat et, ut orationem tempori adventicio paulo accommodemus, in terra pacem ferat omnibus hominibus bonae voluntatis ...

Scripsit Stephanus Weise Halensis