Annus
2 0 0 6


46

DE CAROLO ET OFFICINA SOCOLATAE
Charlie and the Chocolate Factory (UK - USA)

Direxit Tim Burton
Comoediam agunt: Johnny Depp (Willy Wonka), Freddie Highmore (Charlie Bucket), Helena Bonham Carter (Mrs. Bucket), James Fox (Mr. Salt), Christopher Lee (Willy Wonka's father)
Scripsit Roald Dahl
Ad comoediam reduxerunt John August, Pamel Pettler
Imagines curavit Philippe Rousselot
Distribuit Warner Bros.
Produxerunt Richard D. Zanuck, Michael Siegel e Brad Grey per Warner Bros., The Zanuck Company, Plan B Films, Warner Bros.

Fabulam pueris et puellis aptissimam, adultis vero amabilem praebet nobis Timotheos Burton, alteram editionem pelliculae anno MCMLXXI a Mel Stuart confectae, cuius histrio princeps tunc Eugenius Wilder fuerat.

Quinque tesserae aureae in parvis tabulis popularis socolatae Wonka abditae sunt, totidem pueris vel puellis destinatae: qui tesseram invenerit ad officinam visitandam invitabitur unde, quamquam iam diu nullus homo ineat nec exeat, optima dulcia et socolata cotidie totum in orbem mittuntur; uni tantum ignotum et mirabile praemium tribuetur.

Tres pueri et duae puellae, diversis ex civitatibus provenientes, suo quisque cum patre aut matre aut avo iter imaginosum coeperunt, a domino iucundo et solitario Wilhelmo Wonka ducti, per gramina dulcia, flumina et deiectus socolatae, arbusta ex saccharo, ibique comperient centena pumilionum operam suam libentissime dare. Sed officina eiusque dominus vitia et virtutes uniuscuiusque pueri etiam revelabit: quattuor poenis et ignominia afficientur, solus Carolus (Charlie) Bucket, qui usque ad illum diem vitam miseram prope domum fabricatoriam eandem duxerat, mitissimus et humanissimus omnium, praemium singulare accipiet, quo tantum cum familia sua gaudere volet.

Pellicula coloribus choreis cantibus abundat, quibus spectatores iuniores et seniores delectantur; sed satyra etiam intellegitur de mala educatione liberorum temporis nostri, necnon antecedentium: qui voracitatem vanitatem superbiam cupiditatem a parentibus ipsis docentur, potiusquam humanitatem et disciplinam. Optimus omnium Carolus ille se praestat, cui nemo umquam quidquam praecepit, nam pater in officina duram vitam traducebat, mater brassicas sine intermissione coquebat, avi at aviae immoti in lectis futilia verba faciebant: nulla educatio in paupertate meliora effecit quam licentia.

Si cum puero vel puella cinema hoc aspexeritis, ambo oblectabimini; ne tamen vos adultos solos pudeat cancellos officinae portentosae transire!

Scripsit Herimannus Novocomensis



Retro ad:

Novissima editio
Summum paginae