NUNTIUS POST 64 ANNOS PERLECTUS

A-P-P-E-T-I-T-I P-Y-R-O-B-O-L-I-S S-U-B-A-Q-U-A-N-E-I-S. M-E-R-G-I C-O-A-C-T-I. H-O-S-T-E-M S-E-Q-U-O-R. P-O-S-I-T-I-O H-O-S-T-I-U-M A-J 9-8-6-3. C-U-R-S-U-S 2-2-0 A-N-G-U-L-O-R-U-M.V-E-L-O-C-I-T-A-S 8 N-O-D-O-S... - nuntium talem per notas secretas usu machinae sifratoriae Enigma scriptum, misit 25 Novembri anni 1942 capitaneus navis submarinae U-264 Hartwig Looks imperatoribus classis Theodiscae Kriegsmarine, ut hi, si fieri posset, naves agressorias Britannicas aeroplanis aggredi iuberent. Nescivit tamen Looks hunc nuntium, ab hoste receptum, decryptari fore post, hmm, sexaginta quattuor annos. Id est nunc, mense Februario anni 2006.

Nuntius a Britannis receptus talis videbatur:

HCEY ZTCS OPUP PZDI UQRD LWXX FACT TJMB HDVC JJMM ZRPY IKHZ AWGL YXWT MJPQ UEFS ZBCT VRLA LZXW VXTS LFFF AUDQ FBWR RYAP SBOW JMKL DUYU PFUQ DOWV HAHC DWAU ARSW TXCF VOYF PUFH VZFD GGPO OVGR MBPX XZCA NKMO NFHX PCKH JZBU MXJW XKAU OD?Z UCVC XPFT

Quod, si nonnullis mensibus antea receptum esset, in aedibus secretis cryptologorum in oppido Bletchley Park scite occultis, sine magna difficultate decryptaretur, nam ab anno 1939 foederati (tunc Britannia, Francogalia et Polonia) Enigmam legere intelligereque sciverunt, praecipue ob operas trium mathematicorum Polonorum (Marian Rejewski, Jerzy Rozycki, Henryk Zygalski), quibus iam anno 1933 nodos Theodiscos frangere contigerat, deinde ineunte 1939 exemplar Enigmae simile (Bomba nuncupatum) ipsi struxerunt eumque ante cladem Poloniae Septembri eiusdem anni in Bletchley Park miserunt. Anno tamen 1942, cum in summa pugna de Oceano Atlantico circiter 8 500 iussa inter duces Kriegsmarine et naves eorum cottidie mittebantur, Theodisci inopinate nova machina, mutatione scilicet Enigmae, uti coeperunt, cuius linguam legere periti in Bletchley Park nequebant. Adiuvit tamen sors: post sclopetationem pyrobolis subaquaneis navis cuiusdam Theodiscae U-559, nautae eam pontonibus salutariis statim reliquerunt. Putantes navigium sine dubio cito demergendam, nautae minime curabant de re in talibus casibus maximi momenti, id est necessitate libros ad sifrandi usum adhibitos delere. Re mira tamen dirupta U-559 demergi nullo modo volebat et mox ab Anglis cum libris intactis necnon omnibus eius nautis est recepta, Kriegsmarine hac re omnino ignota. Iam post nonnullos dies foederati denuo intelligere linguam Enigmae sciverunt.

Bello finito, relicti sunt e tempore hoc medii 1942 anni nonnulli numquam desifrati nuntii, quorum tres quidam Ralph Erskine mense Decembri 1995 in actis menstruis "Cryptologia" in lucem edidit. Tunc multi talium rerum amatores in omni orbe terrarum ad nuntium capitanei Looks et alios desifrandos studere coeperunt at nunc modo unus eorum, violinista Theodiscus Stefan Kral, nodos primi nuntii post longum laborem fregit.

Navis autem ipsa U-264, cui in vita sua trium annorum tres naves mercatorias Britannorum torpedibus demergere contigit, ipsa die 19 m. Februarii 1944 pyrobolis subaquaneis a HMS Woodpecker et HMS Starling missis in Atlantico septentrionali dirupta est. Omnes 52 nautae intacti a Britannis apprehensi, usque ad finem belli in captivitate manserunt.

Scripsit Nanompouphos