CRATER NUGARUM 5 APRILIS

Lectores, qui iam pertaesi sunt obsessionis meae grandipedem, id est hominidem ignotum sive - ut nonnulli volunt - anthropopithecum, sequi, contristare debeo: modo relationem optimam de incursione in grandipedem inveni Eusebii Sofronii Hieronymi, qui annis 347-420 vixit et aliter notus est ut auctor traductionis in Latinam sanctae scripturae Iudaeorum. Qui de sancto Antonio grandipedem de loco habitationis sancti Pauli primi eremitae quaerente haec narrat: ...conspicit hominem equo mixtum, cui opinio poetarum hippocentauro vocabulum indidit. Quo viso salutaris impressione signi armat frontem et: "Heus tu," inquit, "quanam in parte hic servus Dei habitat?" At ille barbarum nescio quid infrendens et frangens potius verba quam proloquens inter horrentia ora setis blandum quaesivit alloquium. Et dexterae protensione manus cupitum indicat iter et sic patentes campos volucri transmittens fuga ex oculis mirantis evanuit. Et porro (sed huic narrationi minus credo, nam nimis explicitativa videtur): ...inter saxosam convallem haud grandem homunculum videt aduncis naribus, fronte cornibus asperata, cuius extrema pars corporis in caprarum sedes desinebat. Ad hoc Antonius spectaculum scutum fidei et loricam spei ut bonus praeliator arripuit, nihilominus memoratum animal palmarum fructus eidem ad viaticum, quasi pacis obsides, offerebat. Quo cognito gradum pressit Antonius, et quisnam esset interrogans, hoc ab eo responsum accepit: "Mortalis ego sum et unus ex accolis eremi, quos vario delusa errore gentilitas, faunos satyrosque et incubos vocans, colit.

Aliter hoc in cratere de India terra magica nuntiamus:

- summo duci exercitus Indici generali J. J. Singh non placere mappa sive charta geographica totius mundi a societate Google Earth in interrete praebita (quae re vera e photographematibus satellitaribus composita est), nam inter alia et aedes parlamenti Indiae, aedes residentiales praesidentis terrae necnon alias aedes regiminis clare monstrat et deinde terroristis (subauditur: Pakistanis) prodesse possint - queritur gen. Singh ab actis "India Express" percontatus;

- milites autem Indianos limitem Pakistaniensem in montibus Casmiriae inspicientes facilius faciliusque erit supradictos terroristas, antequam terram intrent, vi animae captare, nam iussu ducum disciplinae iogae student; iam centum militum - nuntiat colonellus minor V.K. Batra - hoc ob iogae studium nicotiana fumare alcoholiaque bibere desiverint;

- serpentes fascinare, qui mos a remotissima antiquitate Indis semper aderat, prohibere volunt oecologi provinciae Orisssa, timent tamen hac causa nimis multos ruricolas sine labore mansuros; 300 exempli gratia ex 450 familiarum vici Padmakeshpur serpentes ad libitum peregrinatorum fascinando vitam agunt (Channel News Asia).

Scripsit Nanompouphos