Pater Chiloniensis filium XIX annos natum compedibus prohibere voluit, ne noctu domo relicta cauponas vel discothecas peteret. Compedes filio dormienti imposuit, postea autem adulescenti contigit unum pedem extrahere et – compedibus de altero pede pendentibus – autocineto suo proficisci. Consobrino adiuvante et alterum pedem liberavit. Neque tamen diu libertate furtiva frui potuit, nam interpellatus est a custodibus publicis, quos pater arcessiverat – metuens fortasse, ne filius pedibus adhuc vinctis autocinetum non regere posset.

Puer quinquennis in America sclopetum generis „Colt" in paedagogium (i.e. locum, ubi liberi a tertio ad sextum annum aetatis curantur) attulit. Sclopetum domi clam ex armario parentum ablatum in paedagogio amico monstravit, deinde sacco alius pueri imposuit. Postquam res apparuit, decem dies a paedagogio exclusus est.

Ex actis diurnis „Frankfurter Rundschau"

Scripsit Caecilia Koch