Possessor canis dixit se in ripae muro sedisse, cum canis taxoninus sibi assiliret. Idem vir titubans per quattuor metra in aquam delapsus est. Deinde vulneratus in aggere ripario remansit prostratus. Astyphylaces nuntiaverunt virum fuisse ebrium.
Incommodi autem effector, canis taxoninus nomine „Sunny", non explicuit, quomodo res facta esset. Infortunio facto idem canis statim aufugit evasit erupit. Astyphylaces quaeritaverunt canem, qui in relatione officiali appellatur „monstrum".
Nonnullis demum horis post quidam vicini in loco incommodi ad Vuperam sito invenerunt bestiam aliquatenus mente captam. Siphonarii denuo scalâ allatâ cum accessissent, canem servaverunt. Quaedam viri vicina bestiam recepit curandam.
Hanc relationem d.11. m.Aug. a.2006 in periodico interretiali „Spiegel online" inventam e Theodisco sermone in Latinum convertit Nicolaus Groß praeceptor Sedis interretialis domûsque editoriae, quae appellatur LEO LATINUS:
