Annus
2 0 0 6


ANABATHRO AD ASTRA

ANABATHRO AD ASTRA

Volatus celerrimus navi spatiali per aethera, nullo aere nullaque alia substantia impedientibus, res facillima factu est. Difficultas tamen maxima volatus initium et finis: allevatio super terram (ad quod missilia maximam copiam ignis alimentorum comburentia necessaria sunt) necnon appulsus ad terram aut aliam quandam planetam, cum velocitatem maximam (etiam 30 milium chm/h) "perdere" debemus. Hae difficultates tamen evitandae sint, si astronautae, utensilia eorum, alimenta ignis necnon merces in universum transportandae iter incipiant... anabathro.

Res sonat mirifice, fieri tamen potest - aiunt moderatores societatis cosmicae Americanorum NASA, qui praemio 200 milium dollariorum annuatim tribuendo adhortantur studiosos, ut experimentis scientificis inventa huic rei necessaria excogitent (nomen certaminis - Elevator 2010). Anabathris talibus tamen iter multo longius esset, quam his, quibus cottidie ad summa caeliscalpia vehi assueti sunt magistratus negotiatoresve urbis New York, Hongkong vel Kuala Lumpur, nam usque ad altitudinem 35.786 chiliometrorum nobis ascendendum erit. Hic, in ultimo tabulato, navis cosmica nos expectaverit, qua iter pergemus ad simile anabathrum e.g. in media planeta Martis structum.

Altitudine enim 35.786 chm orbita, ut dicitur, geostationalis terrae invenitur. Simplicissmis verbis, est haec altitudo, ubi res in aethere positae nec cadunt in terram nec ab ea in universum avolant, sed quasi ei alligatae una cum planeta nostra revolvuntur. Nimirum ergo ibi plerique ponuntur satellites, qui undas radiophonicas, televisificas necnon telephonicas transmittunt, nam a terra inspecti, semper immutabiles in uno loco quasi stantes nobis videntur (quamquam re vera velocitate 3 ch/s semper currunt). Immo idem facere possit portus navium spatialium cum ultimo "tabulato" anabathri, a quo regula sive taenia, qua currus anabathri vehatur, in terram ducatur. Maxima totius rei dificultas tamen est regulam talem fabrifacere, nam materia eius vicies durior durissimis a nobis hodie usitatis (ut e.g. kevlar) esse debeat; studiosi tamen convincunt regulam a nanofistulis carbonis faciendam immo duriorem necessario fore, est ergo saltem spes boni eventus!

Si ergo currus tali regulae adpositus celeritate 350 ch/h (plus fieri posse non creditur) vehatur, iter anbathro ad portum navium cosmicarum paululum plus quattuor diebus duret. Tantum, nam in Marte, cuius orbis stationalis 100 milia chm super superficiem planetae invenitur, simile iter 11 dies capiat! Hic alia etiam ac maior difficultas: satis humile praetervolantes lunae (satellites) Martis! Imaginatio tamen studiosorum NASA omnia vincere potest: lunae haec sint evitandae, si regula anabathri non in superficiem planetae inficiatur, sed autoraeda maximae magnitudinis nitatur cum eaque planetam percurrens ita, ut collisio taeniae cum lunis non fiat.

Inventum vix hodie cogitabile, utfieri possit, labores multorum annorum totius exercitus scientistarum exigeat necnon sane pecuniam multorum miliardorum dollariorum. Si nihilominus fiat, volatus omnes spatiales centies hodiernibus viliores reddi possint!

 

GRAVE VICTORIAE PONDUS

Victor litis pronuntiatus est a iudicibus urbis Russicae Taganrog photographus Valeri Morozov, cuius photographematibus sine licentia ab ipso data, possessores gymnasii (Anglice fitness club) cuiusdam publice ut praeconia domus suae usi erant. Ut nuntiat sedes diurnaria RIA-Novosti, damnati praesides gymnasii solvendi erant photographo decem milia rubelorum (circa 340 USD) et solverunt omne usque ad assem... minutissimis nummis duorum vel unius rubeli vel etiam decimae rubeli partis. A rationaria gymnasii, coram testibus, photographus coactus est dinumerare summam 4.500 nummorum in octo peris latentium. Quod cum fecisset, summam recte enumeratam esse Morozov invenit.

 

Aranei nomine Linneano Evarcha culicivora comedere amant - ut facile Latinistae coniectent - culices; nunc autem studiosi Americani invenerunt eas hos culices praeferre aliis omnibus, qui sanguine humano modo cenabantur! Alia res peculiaris Evarchae illius, quae in litore tantum lacus Victoriae (in limine Keniae et Ugandae) est invenienda, mos est culices venandi: araneam texere nescientes, momento temporis 0.04 secundae insiliunt in terga culicum feminarum et statim eas necant, quae pergraves ob recentem potum sanguinis hominum, tam cito avolare nequeant.

 

Praeterita septimana de monte glaciato in Antarctica cantante scripsimus, nunc idem de (minime glaciatis)... muribus! Patet enim, si tantum biologis Timothy Holy et Zhongsheng Guo (Washington University in St. Louis) sit credendum, mares murum, eorum "mulieribus" praesentibus, ad eas sibi alliciendas sonitus producere regulari in serie, cum sylllabis recurrentibus quasi versus intercalares! - quae omnia criteriis cantilenae amantium plane congruant.

 

Erectus, id est verticaliter, sepultus est parlamentarius Brasiliensis Luiz Humbertus Araujo, nam - explicat filius eius - vivus numquam pronus ante pedes alicuiuscumque iacere solebat, item voluit fore post mortem.

 

Casea variorum generum ante somnem manducata omnino alia genera somnium inducant - docent effectus investigationum a British Cheese Board mandatarum. Pro dolor minutia huius rei nondum publicata sunt.

 

Abdomen mendacis magis turbatur quam cor eius, mendacia cum dicat. Id experimentis invenerunt scientistae Universitatis Civitatis Texas, simul electrocardiographio et electrogastrographio homines periclitantes, quibus iussum erat mendacia loqui.

 

Medicamen Viagra maxime prodest... animalibus raris, quorum partibus variis adhuc medici Seres utebantur ad Amorem in "cordibus" virorum expergendum. Inter quas materias erant exempli gratia: cornus rhinocerotis contritus, os tigridis, genitalia phocis, equulei marini necnon ius e testudinibus prasinis coctum. Nunc Viagra ubique praesente, desiderium supradictorum medicamentium citissime cadit.

Scripsit



Retro ad:

Novissima editio
Summum paginae