Annus
2 0 0 6


Untitled Normal Page

GRANDIPEDEM MALESIANUM MALESIANIS TANTUM CAPERE LICET!

Regimen Malesianae provinciae Johor prohibuit alienigenis perscrutari huius provinciae silvas, ut invenirent grandipedem sive anthropopithecum silvestrem homini genetice propinquissimum, quem in silvis montanibus Malesiae habitare multi credunt. Agitur de eodem genere anthropopitheci, quem diurnarii saepissime nomine Tibetanico yeti (homo nivalis) aut Anglico Big Foot (pes grandis) nuncupant cum nuntiant de relationibus hominum, qui se talia spectasse affirmant in monte Imao (Himalaio), Causaso, silvis Indosinarum necnon interioris partis Americae Septentrionalis. Licet desint nobis argumenta gravia talis anthropopiteci exsistentiae (praeter unum breve cinema dubiae si non veritatis, tunc certe qualitatis anno 1967 in California factum), adsunt multi homines studiosi, qui grandipedem adhuc vivere credunt - his eum reliquum hominem Neandertalensem, illis aliud genus Primatum esse putantibus. In regione Caucasica narrant etiam de grandipedibus olim captis domesticatisque - mulier talis silvestris sepulta sit circa annum 1930 in coemeterio vici cuiusdam Abchasiensis...

Praeterito anno exeunti satis magnus numerus relationum de grandipedibus occurrendi venerunt a ruricolis prope ad hortos nationales Endau Rompin habitantibus. Nonnulli affirmant etiam se familias totas eorum per silvas vagantes vidisse. Hi nuntii verisimiliter et regimen provinciae Johor persuasisse videntur, magistratus enim, ne honor anthropopitheci novi inventoris a peregrino caperetur, ad tempus prohibuerunt alienigenis grandipedem quaerere. Qui legem hanc frangat, apprehensus multam ad 2.5 milia USD solvere cogetur necnon in carcere usque ad tres annos teneri poterit!

De historia et statu hodierno "grandipedis venatus" plus scire cupientibus pagina interretialis fraternitatis The Bigfoot Field Researchers Organisation maxime usui erit, ubi etiam plus de ultimis conaminibus regiminis provinciae Johor invenitur: http://www.bfro.net/

Nanompouphos

Scripsit ST



Retro ad:

Novissima editio
Summum paginae