PUGNA POSTCOMITIALIS MUTATUR IN BELLUM GENTIUM

Kenia: non tantum de suffragio agitur

Raila Odinga, candidatus partis oppositae Kenianae, qui putat se suosque victores discessisse recentissimorum suffragiorum praesidentalium necnon parlamentariorum, vult die Iovis manifestationem milionis participantium per vias urbis capitalis Nairobi ducere, manifestationem scilicer reclamitantium officialem suffragii effectum, quem fraudulentum putant quique victorem monstrat adhuc munere praesidentis fungentem Mwai Kibaki. Hic minatur vim contra manifestatores adhibitum iri. Numerus occisorum in pugnis interfactionalibus ultimorum quattuor dierum, qui numerus iam maior trecentis esse timetur, reclamitatione Nairobiana ad effectum perducta tantum crescere potest.

Frustra adhortatur ambos politicos ad communes negotiationes legatus USA necnon regimina terrarum Unionis Europaeae. Frustra adhuc mediationem praebet praeses Unionis Africanae, praesidens Ghanae John Kufuor.

Fautores amborum candidatorum directe, at et ipsi fere expressis verbis se invicem reos genocidii accusant. Hanc escalationem rhetoricae rem omnium ominosissimam periti rerum Kenianarum putant.

Praesidens Kibaki invitavit omnes modo electos parlamentarios ad extraordinariam sessionem parlamenti, sed ei respondens Odingae factio Motus Democratiae Arancianus appellavit ad Kibaki, ut se munere abdicaret.

* ANALYSIS STATIONIS TELEVISIFICAE EURONEWS: Mwai Kibaki erat vir politicus Keniae magni momenti semper abhinc ipsa sui iuris terra facta est anno 1963. Sed caedes, quae sequitur eius in munere praesidentis reelectionem, non tantum re politica explanatur. Mwai Kibaki est homo gentis Kikuyu, quae est maxima gentium huius terrae. Aemulus eius Raila Odinga oritur e gente Luo, quae est altera maxima phyle Keniana. Dominatio in recentissimis decennis Kikuianorum verisimiliter partim saltem fons facta est frustrationis hodiernae gentis Luo.

Kenia complectitur plus quam quadraginta varias gentes ethnicas. Kikuyu, qui inhabitant regiones centrales, constituunt circa 22% omnium civium terrae, dum Luo, qui praesertim in ripa lacus Victoriae vitam degunt, partem 13% faciunt, talem ut tertia maxima natio Keniana, Luhya. Admisce huic divisioni maximam paupertatem ruricolarum necnon horum, qui in suburbialibus regionibus egenis vivunt, et habebis pulverem nitratum qualemcumque scintillam ut sitiens aquam exspectantem.

Talis re vera est civitas, quae ultimis in annis putabatur ab occidentalibus ductorem esse indicis "opulentiae Africanae". Ita vero: productus nationalis passu annuali 6% nuper crevit, haud parvam pecuniam peregrinatores hic relinquere solebant. Quae opes tamen non omnibus aderant: 10% "optimatum" 42% divitiarum terrae in suis manibus tenent, dum dimidia pars Kenianorum vitam pergit sumptu minus quam unius dolarii per diem. Reformationes oeconomicae praesidentis Kibaki fortasse bonam directionem petiverunt, sed - putant multi - nimis lente.

Scripsit Stanislaus Tekieli