De regimine "patriae concordiae" in Libano creando

Maximi duces politici Libanenses, postquam per sex septimanas disputaverunt, concorditer deliberaverunt regimen coniunctim constituendum esse, quod moderabitur hodiernus minister primarius Fouad Siniora (quam in imagine adposita aspicis): fautores tum factionis occidentis amicae, cum partis philosyriacae in eodem ministrorum consilio sedebunt. Praesidens rei publicae Michaël Suleiman, qui in neutram partem propendere putatur, ipse ministros rebus exteris et internis addictos eliget.

Mense Maio praeterito optimum visum est regimen "patriae concordiae" creare, sed pactiones hodie tantum consilium propositum attigerunt: nam et populi discordia et politicorum impotentia recentibus mensibus tantam perturbationem in cedrinam nationem intulerunt, quam nemo ab anno MCMXC meminerit. Regimen Quatariae pacem inter adversarios conciliavit, plerisque nationibus potentissimis faventibus atque urgentibus.

Abhinc difficillima consilia capienda sunt, imprimis de armatis gregis Hezbollah, qui negant se ab armis discessuros esse ne patria indefensa sub Israëlis incursionibus maneat; nonnulli rentur militias illas islamicas inter copias exercitus Libani reducendas esse.

Scripsit Herimannus Novocomensis