De caede in Sinis occidentalibus

Provincia Sinarum occidentalium Xiniang, iam diu turbulenta, letali ictu Lunae die percussa est: nam sedecim custodes publici ob cruentum impetum interfecti sunt, totidem saltem sauciati. Aggressio multo mane in stationem militarem apud confinium Sinarum cum Pakistania facta est: duo tromocratae suam quisque autoraedam agentes duo pyrobola in manipulum militum coniecerunt.

Complures Sinenses islamicam fidem profitentes, qui Uigures vocantur, in provincia Xiniang vivunt, neque hucusque minae a gregibus Uigurum iactatas defuerunt; sed ignorant auctoritates utrum caedes haec ludis Olympiacis connexa sit an alii rationi. Tromocratarum peritus Sinensis LI Wei, magister universitatis Pechinensis, "Quod in Xiniang accidit - inquit - a grege terroristarum accurate paratum est, ut custodia publica oppugnaretur cui securitas commissa sit." Iam pridem studiosus idem monuit periculum terroristicum Sinensibus ex ipsa patria oriri posse, praesertim ex societatibus Uigurum qui a Sinis secedere exoptent.

Scripsit Herimannus Novocomensis