De tumultu mercatorio

Post labem argentariae Americanae Lehman Brothers non desinunt fora mercatoria totius orbis decidere; observatores se talia anno tantum MCMXXIX et MMI aspexisse fatentur. In USA index mercatorium Dow Jones tantopere recessit, ut similia memorabili tantum sessione diei XI mensis Septembris anni MMI evenisse referantur; neque melius res Londinii Tokyone Hongcongi Taipeii Singapurae se habuisse narrantur. Argentariae publicae magnam pecuniam in fora mercatoria infuderunt, ne commercia omnino intermitterentur; dollarii pretium singulariter deminutum est, si cum yene compares. Quae omnia oeconomiae peritis suadent, in summo res discrimine abhinc fore.

Minister USAe rebus oeconomicis addictus Henricus Paulson patriam suam laborare confessus est propter nimiam libertatem quae in foris mercatoriis viguerat, et nuntiavit ardua tempora exspectanda esse; se praecepta foris mercatoriis impositurum esse ne talia in futurum eveniant. Argentariae publicae tamen omnes, et Americae et Europae et Britanniae noluerunt fenus minuere, quam ob rem indices in foris mercatoriis paulatim iterum ascendere Martis die vesperi coeperunt.

Novum terrae motum provident periti, quia AIG, una ex maximis securitariis societatibus, in discrimine magno versatur.

Scripsit Herimannus Novocomensis