De Unione Europaea et caeli mutationibus

Bruxellis convenerunt rectores Unionis Europaeae a Nicolao Sarkozy hodierno convocati, ut deliberarent quid de caeli commutationibus agendum sit: constat enim in orbe terrarum talem calefactionem fieri, ut effectus minime exspectati usquequaque observentur. In Consilio Europaeo tamen sunt qui eventa inopinata, e. g. glaciei perpetuae dissolutionem, crebrescentes procellas tropicales, aestum increscentem, minoris momenti faciant quam recessum oeconomicum qui gradatim in ditissimis nationibus diffunditur: quam sententiam in conventu Bruxellensi vehementer confirmaverunt praecipue legati Italiae et Poloniae. At Nicolaus "Tanti momenti est - inquit - caeli mutati problema, ut difficultates oeconomicae nobis oblivionem suadere non possint." Etiam praesidens Collegii Europaei Manuel Barroso Unionem dixit minime bellum contra caeli commutationes derelicturam esse, deliberationem unanimam hoc ipso anno capiendam esse.Anno MMVII rectores Europae deliberaverant emissiones gasiorum, qui cellae calidariae more aestum retinere putantur, anno MMXX octoginta tantum centesimas fore, si cum emissionibus anni MCMXC comparaveris: fontes roboris renovabilis interea increbuerint.Rectores Europaei etiam de rebus oeconomicis restituendis disputaverunt: immanem vim pecuniae, id est unum milionem milionum euronum, ad fenora inter argentarias sustinenda praebuerunt.

Scripsit Herimannus Novocomensis