Hilaria rerum exterarum ministra

Baracus Obama, praesidens electus Civitatum Americae Unitarum, adversariam suam Hilariam Rodham Clinton ministram rerum exterarum delegit, se maxime confidentem praestantissimae feminae adfirmans. Ut minister rei bellicae Robertus Gates, a Georgio Bush nominatus, permanebit, praefectum vero classis Jacobum Jones munere consiliarii nationalis securitatis fungetur. "Tempus hoc est - ait Baracus - novi diluculi: America eminebit in difficultatibus XXI saeculi superandis et in occasionibus in iisdem difficultatibus latentibus arripiendis." Ad Robertum Baracus mandabit finem bello Iraquico imponere et gregem tromocraticum Al Caëda debellare.

Ne quis de Wilhelmi Clinton uxore suspicetur, antiquus praesidens USAe Hilariae vir cito divulgabit indicem illorum, qui pecuniam instituto benefico a se condito donaverant, et ipsi praesidenti abhinc omnia officia orationes redditus praenuntiabit. Sermonem ante diurnarios Sicagi cum praesidente habens, Hilaria dixit populum Americanum non tantum domi, sed etiam in orbe talem commutationem petiisse, ut vires ad meliora vertantur; se officio suo se totam dicaturam esse. Vel hodierna ministra rerum exterarum Condoleeza Rice Hilariae gratulata est "quae toto ex animo USAm diligat".

Qui tamen repentem commutationem Baraco Obama praesidente fore speraverant, moleste haec nomina ferunt.

Scripsit Herimannus Novocomensis