Annus
2 0 0 8


CONTUSIONIBUS CORREPTI SUNT PRAECLARI BRASILIANI PRO AC MILAN LUDENTES

CONTUSIONIBUS CORREPTI SUNT PRAECLARI BRASILIANI PRO AC MILAN LUDENTES

Kaka, Ronaldo extra ludos

Contusiones decimant his diebus lumina pedifolii: modo Brasilianus Kaka (in photographemate a laeva) inflammatione articuli genus infirmus redditus est et nunc alter eiusdem gentis praeclarus pilicrepus, Ronaldo, ligamento genus rupto fortasse numquam reversurus sit in ludorum stadium. Ambo pro manu Italica AC Milan pugnaverunt.

Kaka, sive Ricardo Izecson dos Santos Leite, anno 1982 Brasiliae natus, ludens ut pilicrepus munere adiutoris fungens, non potuit certamini ad finem inesse contra Fiorentinam (quo certamine Mediolanenses effectu 1:0 Florentinianos vicerunt). Jean-Pierre Meersseman, Mediolanensium doctor, dixit: "Etiam post quinque menses pro certo non sciemus, utrum haereat contusio an non". Sine dubio deerit Kaka, qui anno 2007 palma potitus est optimi pedilusoris Europae ('Sphaera aurea' actorum France Football), proximis certaminibus AC Milan.

Etiam peius res se habere videntur cum petitore Ronaldo (in photographemate a dextra) sive Ronaldo Luis Nazario de Lima, natus anno 1976 Flumine Ianuarii, qui a societate FIFA optimus pedilusor mundi pronuntiatus est annis 1996, 1997 et 2002. Cuius vetus contusio genus, aggravata certamine diei 13 Februarii contra Livorno, verisimiliter longissime procul a campo eum tenebit. Medici non excludunt fieri posse, quin omnino in ludum Ronaldo reverti non valuerit.

Scripsit Monica Wesolowska



Retro ad:

Novissima editio
Summum paginae