Annus
2 0 0 8


Senegal bowled over by boules

GLOBI PROVINCIALES

Vincunt, ut semper, Galli

Dacariae urbe capitali Senegaliae habitum modo est certamen mundanum annuale globorum Provincialium, magis in orbe terrarum notorum Gallico nomine 'petanque', nam imprimis in Francogallia eiusque quondam colonis ludus hic floreat. Quod certamen mundanum iam 44. vice peractum est.

Denuo in classificatione gregali triumphavit manipulus Francogallicus, lusoribus Lacroix, Suchaud, Leboursicaud, Grandet (iidem quattuor etiam praeterito anno Pattaiae Thaiorum campiones mundi facti erant). Alterum locum cepit grex nationalis Thailandiae, tertium ex aequo Belgae necnon alius grex Gallorum. Ita Galli denuo ceperunt titulum campionum mundi globorum Provincialium, quem unoquoque anno capere solebant ab anno 2001.

In classificatione tamen "ictus perfecitissimi" victor discessit lusor Marochianus, Abdel El Mankari, alter venit Senegalius Francois N'Diaye, at demum tertium locum cepit Gallus (Pascal Milei) ex aequo cum athleta Burkinafasiensi (Salif Ouedraogo).

Inter 53 nationes primum lusores Libani certamini aderant, qui etiam, omnino pacifice, agone cum vicinis suis Israelianis fruebantur. "Nos lusores pacem petimus, non bellum" - dixit post hunc agonem athleta Israelianus, Tal Alkobi, qui octavum iam certamini annuali aderat.

Ludus globorum Provincialium a circiter 1907 anno luditur originemque e Provincia regione illa maritima Gallorum ducit. Nomen 'petanque' etymon habet in verbo Provinciali 'ped tanco', quod significat 'pedes iunctim', nam talis esse debet pedium positio tempore ictus globo. Ludo peracto lusoribus mos semper erat in Provincia temetum anisiacum una bibere; utrum id peractum sit Dacariae, diurnarii tacent.

 

Scripsit ANL



Retro ad:

Novissima editio
Summum paginae