NOVUS TERROR PANICUS FORIS IMMINET

Pyramis Madoff collapsa est

Neoeboraci apprehensus a biocolytis est proxeneta Wallstreetianus necnon quondam praeses fori negotiationum novae technologiae Nasdaq, Bernard Madoff, accusatus defraudationis usque ad 50 miliarda dollariorum.

Secundum actores publicos Madoff, aut rectius eius negotiatio collocatoria Madoff Investement Securities, pecuniam collocatorum ab anno 2005 avertebat fruens mechanismis notis ut pyramides sive schemata Ponziana, id est lucrum clientibus referens e pecunia a novis collocatoribus attracta. Talis modus pecuniae 'collocandi' valebat usque ad praeteritum annum, cum ob crisin hypothecariam novi collocatores non plus apparerent at veteres lucra promissa (quorum hoc mense Decembri ineunte esset 7 miliarda USD) statim iis solvenda poscerent. Omnino tamen agi hic potest de quinquaginta miliardis dollariorum, inter quae adsint etiam collocationes haud parvi momenti collocatorum, ut possessor praeclarae manus pilae basicae New York Mets, Fred Wilpon, quondam possessor manus pilae pedifollis Americanae, Norman Braman, necnon argentariae BNP Paribas, Nomura Holdings, Santander et Neue Privat Bank Turicensis.

Analytici rerum oeconomicarum timent ne rebus ita stantibus collocatores terrore Panico percussi nunc poscant reditum pecuniae ab aliis subsidiis collocatoriis, quod fora mundana denuo in peius adducere possit.

- Quisque adhuc vivus est, sine dubio poscet sui pecuniam a talibus subsidiis - vaticinatur Doug Kass, praeses Seabreeze Partners Management.

Scripsit ANL