LIBER, QUI EXPLANAT, CUR RES DIURNARIA HODIE TAM MALE SE HABEAT

De gustibus lectoris...

Utrum fallant diurnarii an non, iam longe inter lectores ephemeridum contenditur. Aut fortasse rectius, utrum fallant omnes?

Investigationibus huius rei peractis Nick Davis, rei diurnariae peritus universitatis studiorum urbis Cambrianae Cardiff, respondet: fallunt non omnes, sed saltem duae trium partes. Ita enim patet ex simplici computatione: hodie numerus diurnariorum in insula Britannia plus minusve idem est, ut erat ante viginti annos. Ab hoc tempore tamen numerus paginarum omnium actorum diurnorum periodicorumque (cum appendicibus oblectatoriis, foliolis, paginis interretialibus etc.) ter tantum est ut ante dua decennia esse solebat. Rebus sic stantibus idem numerus hominum ter tantum symbolas scribere debent, quod perficere natura pigri diurnarii aliter non possint quam fallendo, res insolitas e mente inveniedo, res veras nimis mirifice describendo...

Maximo hic periculo esse istos "advocatos diaboli" sive societates relationibus publicis curandis (notae acronymo PR ab Anglicis verbis 'public relations'), qui de otio somniantibus diurnariis suos productus praebent (aut fortasse suorum clientorum - negotiationum mercatoriarum), suadentes, ut haec scripta parum mutata prelis tradant oratione recta, sine coniunctivo mentis alienae. Secundum Davis 60% symbolarum in ephemeridibus Angliae sunt copiae aut aliarum symbolarum aut documentorum PR.

De mala qualitate scriptorum actorum hodiernorum iudicat Davis: verum, malae qualitatis sunt; ita ut gustus lectoris hodierni. Et quasi addit sententiam: decipi si mundus vult, decipiatur.

* Nick Davies, Flat Earth News: An Award-Winning Reporter Exposes Falsehood, Distortion and Propaganda in the Global Media. (Nuntii terrae planae. Praemiatus relator adaperit mendacia, distortionem factorum et propagandi studium in re diurnaria mundana. Domus editoria: Chatto & Windus. Numerus paginarum: 416. Pretium in Britannia: 17,99 librarum.

Scripsit Stanislaus Tekieli