De Drepani salinis

Unde nobis sal? Postquam mirabiles salinas apud Drepanum, oppidum Siciliae occidentalis, visitaveris, illum humilem pulverem cotidianum colere disces: tum durum hominum laborem et sapientiam diuturnam intelliges ibi abdita esse.

Putantur Phoenices primi salinas apud Drepanum condidisse; quarum usum et fructum studiosi pro certo habent anno MCDXL p. C. n. ab regibus Alphonso et Ferdinando Aragonensibus aliquot feudatariis esse legatum, qui bene de regno meriti essent. Anno MCMXCV gubernatores regionis Siciliae superficiem decem milionum metrorum quadratorum severe servandam esse constituerunt et praeclarae societati mundanae naturae tutandae deditae WWF commiserunt: nam ibi aves migratoriae consistere solitae sunt, laboriosa itinera intermittentes et autumno in Africam et vere ad regiones mitiores. In salinarum finibus ducenta octo genera avium adhuc agnita sunt, quarum nonnulla exstinctionem periclitantur: exempli gratia Platalea Leucorodia, Phoenicopterus Ruber, Casmerodius Albus plurimaeque species anatum; praeterea bufones et lacertae rarae inveniuntur.

Sed quomodo sal ex maris aquis extrahitur? Salsus liquor pistrini vi infunditur in piscinas amplas, quas "frigidas" vocant, ubi solis aestus aquam in vaporem convertit et liquorem sale densiorem efficit; inde in piscinas "fere calidas" liquor transfunditur ut idem iterum fiat, denique in piscinis "lenocinantibus" sal crystalli instar rastris et palis in acervos colligitur. In sale marino, aliter atque in sale e fodinis effosso, non tantum natrium chloridricum sed etiam kalium magnesium iodium bromum aliaque benefica elementa inveniuntur.

Scripsit Herimannus Novocomensis