Annus
2 0 0 8


Starring:

Oscula

(Kisses)

Hibernia - Dania -Suetia anno MMVIII

Direxit scripsit et in scaenam reduxit Lance Daly, pelliculam exstruxit J. Patrick Duffner, musicam curaverunt Go Blimps Go, vestimenta curavit Leoni Prendergast, imagines curavit Lance Daly, scaenas curavit Waldemar Kalinowski; partes maximi momenti egerunt: Kelly O'Neill (Dylan), Shane Curry (Kylie), Paul Roe, Neilí Conroy, David Bendito, Elizabeth Fuh, Bob Dylan; produxerunt Ben Keenan, Fastnet Films et Zentropa.

Quis putet duos adolescentes quos in imagine conspicis tam suavem et acrem fabulam agere posse, quorum neuter umquam recitaverit? Si potestis "Oscula", pelliculam hanc Locarni primum demonstratam, sine ulla mora adspectate et admiramini!

Et Dylanus et Kylia, quorum domus in Dublini suburbiis finitimae sunt, in familia sua vexantur. Pridie Christi diem natalem effugiunt Dylani fratrem, qui iam diu evanuerat, requirentes. Quem minime inventuri sunt, sed Dublinum alacre et violentum peragrant, primum tabernas laeti visitantes deinde noctem periculosam atque horrificam transeuntes. Mira cum fortuna salvi, erronum more sub crassa charta obdormiscunt et ab astynomis domum iterum advehuntur. Amborum tamen vitae in perpetuum commutatae sunt, postquam periculum summum et mutuam amicitiam cognoverunt, cuius gratia alter alteri acceptam salutem refert: non iam puer et puellula, sed iuvenes facti sunt, tametsi sua quemque acris vita domestica exspectat.

Pellicula est haec acris et suavis, qua lucens et tenebricosum Dublinum ostenditur, symbolum urbium saeculi primi et vicesimi: cuius feritas nihilominus viam salutis et dignitatis recipiendarum praebet. Neque minoris momenti spectatoribus videatur auctoris querela propter vim adolescentibus domi allatam.

Scripsit Herimannus Novocomensis



Retro ad:

Novissima editio
Summum paginae