MILITES ISRAELIANI NAVEM IN ALTO OCCUPANT

Caedes in mari Mediterraneo

Navibus, quibus res auxiliariae in Gazam ferrentur, vi armisque occupatis ulla fere civitas est, quae regimen Israelianum non vehementissime vituperaret. Turci Israelibus crimini dederunt, quod vitam humanam neglegerent. Unio Europaea poposcit, ut inquisitio rerum gestarum fieret. Sed nemo adhuc certe scit, quot homines in ea caede, quae facta est in aquis internationalibus, perierint.

Cum ii, qui exercitui Israeliano praesunt, novem ex iis perisse affirmarent, qui Palaestinenses adiuvare voluerunt, alii plus XV eorum interfectos et XXVI vulneratos esse dixerunt.

Acerrime impetus militum Israelianorum a Turcis vituperabatur. Damnum, quod res rationesque, quae essent inter utramque civitatem, cepissent, irreparabile esse. Israeles tela ad cives innocentes intendisse; qua re iterum eos demonstrasse pacem vitamque humanam sibi curae non esse. Primus minister Turcus, Recep Erdogan, Israelibus “terrorismum publicum” obiecit, quippe qui ius gentium contemnerent.

Regimen Hispanum, quod hoc tempore praesidiatum Unionis Europaeae obtinet, impetum ab Israelibus factum „rem gravissimam nec tolerandam“ appellavit, quam diligentissime inquiri oporteret. Saad Hariri, primus minister Libanensis, et Baschar al Assad, praeses Syriae, etiam monuerunt, ne hac re incitata novum in ea regione bellum oreretur.

Sed dubium est, quid mane Lunae diei acciderit, cum cohors specialis impetum in navem faceret. Ii, qui pro exercitu Israeliano loquuntur, affirmant culpam caedis apud eos cives esse, qui parati fuerint ad vim adhibendam. Cui sententiae sodalitas „Gaza Libera“ vehementer repugnavit: neminem eorum milites armis esse aggressum.

Ehud Barak, minister rerum militarium, dixit quosdam eorum, qui in ea nave versarentur, occupantibus vi adhibita restitisse; in tanto periculo milites veluti coactos fuisse, ut sui defendendi causa sclopetarent, ne a multitudine dilacerarentur.

Contra instructores sodalitatis „Gaza Libera“ demonstraverunt ex taeniis visificis sine ullo dubio apparere milites, ubi navem ascenderent, in participes expeditionis sclopetavisse.

Unus e nautis navem Graecam „Eleftheri Mesogeios“ gubernantibus – quae navis ad illam classem pertinet – in televisione Graeca: „Isti (scil. Israeles) omnes fere abstraxerunt“, inquit, „ego et praefectus adhuc restamus. Glandibus cummeis sclopetavere. In homines sclopetavere, homines caedebant... »

At Israelibus videndum erit, ne amicitiam eorum quoque perdat, qui bono adhuc animo sint. Graeci iam exercitationibus militaribus, quae una cum Israelibus gerebantur, finem feceruntt. Etiam laboriosus ille processus pacis adipiscendae in ambiguo est.

Scripsit Volfgangus Austriacus