KOMOROWSKI NOVUS PRAESIDENS POLONIAE

Polonia divisa in aequales partes

Secundum finales effectus suffragandi, novus praesidens Poloniae a populo electus est Bronislaus Komorowski factionis liberalis Fori Civici (PO), qui vir ultimos tres fere menses, ut praeses parlamenti, secundum legem successionis simul munere praesidentis civitatis ad interim fungebatur, praesidente pristino, Lesculo Kaczynski, qui e conservativa factione Lex et Iustitia (PiS) erat oriundus, occiso in infortunio aeronavis ad urbem Smolensciam Russorum. Aemulus Komorowski erat frater geminus mortui praesidentis, praeses PiS, Jaroslaus Kaczynski, qui ante duos annos munere ministri primarii Poloniae fungebatur.

Victoria tamen Komorowski parva tantum praestantia (52,6% et 47,4%) suffragiorum collectorum evenit. Ita fit ut societas Polona dividi videtur inter aequales fere partes fautorum cursus liberalis oeconomiae integrationisque arctioris cum Unione Europaea et ex altera parte fautorum 'civitatis socialis', qui suffragatores magna e parte suspiciose ad Unionem Europaeam ut 'supercivitatem' spectant.

Komorowski in praesidentatum electo data est facultas factioni PO tempore saltem unius anni (usque comitia parlamentaria) audacissimas reformationes oeconomicas promovere; adhuc enim leges hanc rem promoventes maxima e parte vetatae erant a pristino praesidente.

Scripsit iconoclastes.blog.onet.pl