APPREHENSUS EST IN AUSTRIA MINISTER PRIMARIUS QUONDAM CROATIAE

Ivo Sanader in patriam reverti non vult

Ivo Sanader, prior praefectus regiminis Croatici, qui largitionis insimulatus in Austria comprehensus est, recusat, ne Zagrabiam revertatur, quod de libidine magistratuum Croaticorum sollicitetur: cum in patria sua causidicis ius negetur tabellas inspiciendi, iudicium ipsum non esse aequum.

Sanader, qui hoc tempore Iuvavi custodia tenetur, recusavit, ne brevi manu Croatis traderetur. Cui rei si assentitus esset, fieri potuit, ut intra paucos dies traderetur. Nunc autem de traditione eius agendum erit. Si cognitores eum in Croatiam tradi iusserint, Sanadero licebit iudices superiores appellare; ex quo fieri, ut traditio eius denuo in posterum differatur.

Magistratus Croatici praefecto suo priori vitio vertunt, quod munere suo graviter abusus sit, cum ex pecuniis mutuis fenore dandis nimis lucraretur. Ex qua re non solum partes HDZ, sed etiam nonnullos privatos lucrum fecisse. Omnino eum sexagies centena milia euronum avertisse, quod Sanader vehementer negat.

Syngraphos filiae uxorisque nuperrime ab iudicibus Croaticis occupatos esse Sanader ipse ex libidine factum esse dicit, cum magistratus conscientiae eas insimulent.

Scripsit Volfgangus Austriacus