Annus
2 0 1 0


FORA CRESCUNT OB MELIORA DATA MACROOECONOMICA

FORA CRESCUNT OB MELIORA DATA MACROOECONOMICA

Spes novi animi alti?

Praeteritos tres dies fora bursaria mundi creverunt ob meliora opinato data statistica manantia ex USA, Sinis et Europa. Maxime gavisi sunt pecuniae collocatores praesertim novissimis editionibus indicium activitatis industrialis: ISM (US-Americanorum) et PMI (Sinensium). Quae ambo super limen 50 punctorum manent, quod spectat ad incrementum oeconomiae (dum numeri infra limen 50 punctorum suggerant recessionem). Incertis datis praeteritorum mensium, periti rerum oeconomicarum non erant omnino certi, utrum ambae maximae oeconomiae orbis terrarum adhuc progrediantur an retro cedant. Nonnulli collocatores praeteritis septimanis coeperunt queri de imminenti altera phasi crisis globalis, post scilicet primam annorum 2008-09.Melior exspectata erat quoque condicio mercatus laboris in USA mense Augusto: adhuc numerus hominum labore egentium ibi crescit, passu tamen lentiore. Peior opinato est tamen index ISM, qui attinet ad non-industriales sectiones oeconomiae US-Americanae.

In tota modo finita septimana index negotiationum bursae Neoeboracensis, S&P 500, auctus est 3,8 cenetesimis, quod spectat ad optimum effectum proximarum praeteritarum hebdomadum. Index fororum totius mundi MSCI crevit hac septimana 3,6 %.

In fora rediens animus altus, sit ille moderatus, fulsit "nummos periculosos", ut sunt euro et praecipue dolarium Australiense et Neozelandense (cadit tamen valor dolarii USA). Ob eandem causam creverunt pretia cupri et argenti.

Scripsit Stanislaus



Retro ad:

Novissima editio
Summum paginae