Annus
2 0 1 0


PETRVS CHRYSOLOGVS

PETRVS CHRYSOLOGVS

Graece sonans agnomen Chrysologi sive eius, qui verbum (lógon) habet aureum (chríson), inditum est Petro episcopo Ravennatensi, ut in lumine poneretur eximia eius eloquentia Latina, quae videbatur similis illi sermoni Graeco, propter quem Ioannes Constantinopolitanus ornatus erat agnomine Oris aurei seu Chrysostomi. Re quidem vera Petrus bene noverat opera Ciceronis, Vergilii, Senecae, quarum gemmis oratoriis libenter utebatur.

Natus est anno fere quadringentesimo (400) in Italica valle Paduana, antiqua illa Gallia cisalpina, in oppido Forum Cornelii (Imola), quod fuerat colonia Romana condita a Cornelio Sulla dictatore. In rebus Christianae fidei et morum post parentes educavit eum Cornelius episcopus Forocornelianus, qui etiam – post theologica studia a Petro adiuncta ad Latinas litteras – consecravit eum sacerdotem.

Dotes Petri videntur non diu latuisse in ambitu natalis oppidi, nam circa annum quadringentesimum trigesimum ille apparet in episcopali sede Ravennatensi.

Momentum huius sedis crevit ab eo tempore, quo urbs Ravenna facta erat sedes imperatoris Occidentis. Hac de causa ad Petrum scripsit Eutyches abbas Constantinopolitanus sperans fore, ut Petrus – facilem habens aditum ad domum imperialem –, adiuvaret eius sententiam theologicam extreme oppositam errori Nestorii, ex qua Dei Filius post incarnationem haberet unam tantum naturam eamque divinam, quae velut absorbuisset humanitatem: unde error Eutychii appellatus est nomine monophysitismi seu doctrinae de unica (mon?) natura (phýsis) Filii incarnati.

Tempore nativitatis Domini anno quadringentesimo duodequinquagesimo (448) Petrus Eutycheti respondit quidem comiter, sed eum hortans, ut opinione desisteret, in primis ideo, quod res iam diu controversa in Byzantio, paulo ante esset declarata a Leone papa, qui dogmaticis suis litteris nomine Tomus responderat Flaviano episcopo Constantinopolis. Abbatem simul commonefecit de traditionali doctrina de una Christi persona in duabus naturis, quam exposuerat pontifex in Tomo, addens: ‘Esto certus Petrum loqui per Leonem’.

Admirabile est episcopos Graecos tribus annis postea (451) in concilio Chalcedonensi (hodierna pars Kadiköy urbis Istanbul-Constantinopolis), cum audivissent Tomum, qui perlectus est, laudantes surrexisse et clamavisse: ‘Haec est fides apostolorum; haec omnes credimus; Petrus locutus est per Leonem’, quamquam nesciebant id, quod Petrus Ravennas Latine scripserat Eutycheti. – Petrus senex traditur reversus esse Forum Cornelii, in oppidum suum natalem, ubi mortuus est die 3 XII 450.

Scripsit fr. Benedictus Huculak (OFM)



Retro ad:

Novissima editio
Summum paginae