MQM RELIQUIT REGIMEN GILANI

Pacchistania sine gubernatione?

Altera maximi momenti pars coalitionis Pacchistaniam regentis, Motus Muttahida Qaumi (MQM), revocavit e regimine duos suos ministros. Rebus ita stantibus gubernatio ministri primarii Yusuf Raza Gilani (photographemate monstratur a laeva) non porro nititur maiori parte sellarum in parlamento.

Causam rixae intraregiminalis fuisse subito annuntiatum a Gilani incrementum pretii petrolei et naphthae. Multi credunt tamen MQM uti hoc facto sicut praetexto, quo fidem populi sibi conciliet, sperans se in comitiis ante tempus solitum convocatiis maiorem partem sellarum in parlamento expugnaturam quam adhuc habet (i.e. 25 per 342 omnes).

Minister primarius Gilani non putat nihilominus regimen sui esse in periculo. "Nullum signum crisis perspicio" - dixit, a diurnariis in programmate televisifico rogatus. Sine dubio regimen nunc conatur alios socios factiones minores sibi attrahere, sed - secundum rerum Pacchistaniae peritos - sine magna probabilitate boni eventus.

Factio MQM gratissima omnium esse videtur apud incolas maximae in hac terra urbis, Karachi, necnon provinciae ei vicinae, Sindh, ubi quoque condicio ethnica et religiosa maxime difficilis est ac permulti perpetrantur ictus terroristici.

Scripsit Stanislaus Varsoviensis