De Coptorum die Natali

Noctu Papa Shenouda III, qui ecclesiae Copticae Aegyptiae praeest, missam nocturnam Cairi celebravit: ubi die VII mensis Ianuarii quotannis ortus Jesu Christi commemoratur, pridie praenuntiatur. Exercitus Aegypti accurate invigilavit ne ullo periculo fideles qui ritui se conferrent obicerentur: recenter enim XXIII Alexandriae homines ictu tromocratico interierant. Ergo per apparatus metallis detegendis idoneos in templum initum est.

Multi Christiani atrati celebrationi adfuerunt, ut luctus indicium. Prope templum Copticum multitudo Muslimorum amicitiam fidelibus patefecerunt; praesidens Hosnis Mubarak proclamaverat non solum Coptos sed omnes Aegyptios cruenta caede affectos esse. Non defuerunt paginae interretiales unde ad ictus perpetrandos Muslimi moniti sint; nihilo minus usque ad hoc tempus nulla perturbatio nuntiatur.

Decimus quisque Aegyptius Christianus Coptus esse putatur.

Scripsit Herimannus Novocomensis