Annus
2 0 1 1


Quando,

Quando, nisi nunc?

Multitudines Italiae fora die dominico repleverunt, ut mulierum dignitatem adfirmarent et Silvium Berlusconi, ministrum primarium de cuius compluribus flagitiis sexualibus in toto orbe narratur, abdicationi cogerent. Cuius libidinosa intemperantia non solum scortis adultis utendo impellit sed etiam amicis suis mandando, ut sibi iuvenes feminas promissis allectas in aedes suas magnificas adferant. Silvius Berlusconi repetundarum et adolescentalis meretricii accusatus ante iudices urgenti ritu vocatur, quod magistratus requirentes se indicia certissima collegisse censeant. Romae Neapoli Panormi Mediolani Tergesti Bononiae et in compluribus urbibus et oppidis mulieres reclamaverunt, neque viri defuerunt; similiter congregatae sunt turbae Londinii Lutetiae Athenis Malmogiae.

Insignes oratrices ex rostris concorditer proclamaverunt non omnibus feminis pecuniam quolibet pretio cordi esse. Haec verba sororis catholicae Eugeniae Bonetti (quam in imagine adposita aspicis) Taurini coram multitudine pronuntiata referenda videntur: "Vocem cupio donare illis, qui voce carent, novis servabus quae in patriam nostram vitam meliorem requirentes advenerint. Ipsarum necnon omnium nostrum causa mulierum dignitatis tutelam invoco. Illarum servarum gratia, quarum nos sorores et matres sumus, interrumpenda est haec nefanda mulierum mercatura quae humanae dignitati obsistit."

Scripsit Herimannus Novocomensis



Retro ad:

Novissima editio
Summum paginae