Iter pedestre a Barcinone Matritum

Per undetriginta dies "indignati" ab urbe Catalana ad Hispaniae caput iter pedibus faciunt

Quinquaginta reclamantes, qui se indignatos appellant, neglecto aestu Saturni die Barcinonem reliquerunt Matritum versus, iter DCLII chiliometrorum uno mense perfecturi; alia cohors Valentia profecta, alia Gadibus cum Catalaunis confluet ut die XXIV mensis Julii Matriti ingens turba congregetur dissensionem cum gubernatoribus patefaciens. Cotidie novum oppidum attingetur, ubi conventus publicus habebitur et alii iuvenes se viatoribus coniungent. Hoc scribunt reclamantes in folio nuper edito: "Ambulando alius cum alio colloquitur, alius alium audit, simul res futurae multae et variae exstruuntur. Hoc unum commune est: indignatio." Medicus et aegri ministra opera orbati cohortem Catalaunam sequuntur, incommodo vel aegritudini cuilibet parati.

Iuvenes Hiberici, qui exemplum Arabicorum oppositorum secuti sunt, contra politicorum corruptelam sibi operam et tempora meliora repetunt: huius spei gratia ante unam septimanam bis centena milia hominum in tota Hispania reclamaverunt.

Scripsit Herimannus Novocomensis