Annus
2 0 1 1


Sudaniae meridionalis vexillum extollitur

Sudaniae meridionalis vexillum extollitur

Jubae multa milia civium novum vexillum sursum elatum collaetantes aspexerunt, nam hodie Sudania meridionalis libera respublica facta est. Salva Kiir, praesidens nuper electus, sollemniter ante multitudinem magistratum iniit et ius iurandum concivibus suis dedit, in legis supremae prima pagina nomine subscripto. Tam praesidens Sudaniae septemtrionalis Omar al-Bashir quam segretarius Ordinis Nationum Unitarum Ban Ki-moon caerimoniae aderant.

Novae civitati constituendae facultas data est, postquam anno bismillesimo quinto pactionibus finis impositum est diuturno bello civili, quo circiter XV centena millia hominum interierant, et suffragia libera de Sudania dividenda habita sunt.

Sudania meridionalis est una ex miserrimis totius orbis civitatibus: multae matres etiam nunc facillime partu decedunt, item septimus quisque infans nondum quintum annum natus, plerique pueri et feminae litteris carent, nonnullis rebellium manipulis vici et oppida vexantur. Nihilominus abundat petroleum, cuius venum dati beneficia a Sudania septemtrionali et societatibus occidentalibus exiguntur.

Scripsit Herimannus Novocomensis



Retro ad:

Novissima editio
Summum paginae