Annus
2 0 1 1


<h2>Zavia et Zilita sub rebellium dicione</h2>

Zavia et Zilita sub rebellium dicione

Rebelles, qui Mahometum Gaddafi Libyae a praesidatu depellere conantur, confirmant se post acria proelia oppida litoranea Zaviam et Zilitam expugnasse, quarum altera ab occidente altera ab oriente ad Tripolim spectat; praeter hoc Bregam, portum orientalem, se certe et definite occupasse.

Regiminis nuntii negant copias regulares a Zilita omnino recessisse. Zaviae officinae petroleificae Jovis die occupatae sunt (cuius rei in imagine adposita testimonium praebetur), quae exercitus vehicula et machinas bellicas copiose alebant; Veneris die ab diurnariis externis cadavera mercennariorum in Zaviae viis iacere narrantur et oppidum in rebellium potestatem iam redactam esse. Nunc oppositoribus utrimque patet via ad Tripolim adgrediendam et conquirendam, dum agmina seditiosa a solitudine meridiana ad urbem versus iter faciunt et naves foederis occidentalis portum Tripolitanum observant.

Omranus Abukraam, minister petrolei regiminis Libyci, aliorum exemplum imitatus, munus suum reliquit et ex Italia in patriam non rediit, in Tunesiam confugiens.

Scripsit Herimannus Novocomensis



Retro ad:

Novissima editio
Summum paginae