Annus
2 0 1 1


Italia legatum ab Irania revocavit

Italia legatum ab Irania revocavit

Auctoritates Italicae legatum a re publica Iranica ad eum consulendum hesterno die revocaverunt. Quod consilium Bruxelli ab Administro Exteris Negotiis praeposito Iulio Terzi nuntiatum est: maiore diligentia exquirere necesse quid priore die Martis accidisset cum impetus contra sedem legationis Britannicae factus esset. Nuntius vulgatus est postquam, habito concilio, XXVII res publicae Unionis Europaeae statuerunt ut severiores redderent adversus Iraniam rerum commercialium interclusiones quae attinent ad rem nummariam et energeticam et vectoriam; in summa CLXXX ex societatibus et hominibus. Quod decretum est praesertim cum timor sit ne in officinis Iranicis ad efficienda arma atomica aliqua periti scientiarum experiantur. Praeter Italiam etiam Germania et Batavia nuntios revocaverunt, sed Britanniae Regnum prorsus sedem legationis clausit; intra nonnullas horas legatis Iranianis Britannia relinquenda est.

Auctoritates Iranianae ex custodia eos qui in urbe Teheran sedem legatoriam Britannicam adorti sunt iam dimiserunt. Relator Administri praepositi Exteris Negotiis et vicarius praefecti publicae securitatis custodum promiserunt reos vocatum iri in iudicium, sed, ut videtur, aggredientibus statim venia data est.

Scripsit Lydia Ariminensis



Retro ad:

Novissima editio
Summum paginae