Etiam Melitensibus divortium facere nunc licet

Praeter insulas Philippinas et civitatem Vaticanam nusquam in orbe nisi in Melita divortia adhuc erant vetita. Sed mense Maio Melitenses suffragia tulerunt, ut divortia lege sancirentur. Populi sententiam magistratus se secuturos polliciti sunt, quamvis et Laurentius Gonzi primus minister et ecclesia catholica antea censuissent legem non esse mutandam.

Tamen longe maxima pars legatorum popularium censuit, ut lex mutaretur. Quae valebit, cum Georgius Abela praeses civitatis eam subscripserit.

Quamquam coniugibus inter se discedere adhuc licuit, tamen difficile erat novas facere nuptias, quia opus erat, ut ecclesia prius matrimonium antea aboleret.

Scripsit Volfgangus Austriacus