Sudanenses meridionales de libertate suffragia ferunt

Suffragiis de libertate Sudaniae meridionalis initis populus ad locos suffragatorios confluit. Qua re permulti valde commoti sunt. Etiam Salva Kiir, praeses Sudaniae meridionalis, unus ex iis, qui primi iure suffragii utebantur, lacrimas vix sustinere potuit. Usque ad a.d. XVII. Kal. Feb. civibus suffragia ferre licebit, quorum eventus mense Februario ineunte constabit.

Etiam Sudanenses meridionales in urbe Khartum ceterisque in urbibus septemtrionalibus habitantes suffragiis interfuerunt. Tamen in regionibus septemtrionalibus contra omnium exspectationem haud multi fuere, qui in numerum suffragatorum se rettulerint.

Hoc suffragium pars est pactionis de bello civili finiendo; quod bellum XXI annorum anno MMV confectum est. Quamquam Omar al-Bashir, praeses Sudaniae, cives monuit, ut unitatem servarent, nemo fere est, quin credat fore, ut regio meridionalis pro libertate suffragetur. Salva Kiir, praeses regionis meridionalis, cum duas milliones hominum in memoriam revocaret, qui bello civili interfecti essent, "illi mortui", inquit, "hodie nobiscum erunt. Si libertatem temptemus, illos non frustra perisse pro certo habeo".

Multi homines in urbe Iuba noctem sub divo pervigilabant, ut praesto essent, cum loci suffragatorii aperirentur. Suffragia ipsa, ut in taeniis scriptum erat, "ultimum ad libertatem iter" appellaverunt. Georgius Clooney, histrio Americanus, summa cum laetitia "Toti orbi" , inquit, "hic dies erit magni momenti".

Populo in suffragium misso tamen multae res dubiae restabunt. Neque enim adhuc convenit de confinio inter utramque regionem, deinde, qua ratione copia petrolei, qua utraque pars carere non potest, tribueretur. Denique nomen civitati novae quaerendum erit: mentio fit de "Nova Sudania Aequatioria" et de "Iuvama" et de "re publica Nilotica".

Scripsit Volfgangus Austriacus