Michael Gorbatschow, pristinus praeses Unionis Sovieticae, die natali suo octogesimo moderatores Russos denuo vehementer vituperavit: sub praeside Demetrio Medwedew et primo ministro Vladimiro Putin iura humana libertatemque imminui, quod non tolerandum esset. Gorbatschow, qui „ bellum frigidum“ finiverat, dixit fieri posse, ut civitates armis atomicis carerent, novissimumque foedus armis atomicis minuendis probavit, quod Russi cum Americanis fecerunt. Sed in civitate Russa condicionem socialem esse difficilem, quia pretium victus ac medicamentorum atque energiae usque augeretur.

Michaelem Gorbatschow rem publicam tempore difficili ac concitato administravisse Medwedew dixit; cuius rei se omnes bene meminisse. Putin, qui per litteras gratulatus est, eximium nostrae aetatis gubernatorem eum appellavit, cuius consilia multum ad res in orbe gerendas contulissent. Quod mirum est, cum Putin quondam interitum Unionis Sovieticae „summam eius saeculi cladem“ appellaverit.

In civitatibus occidentalibus Gorbatschow laudatur, quod consilia rationesque eius („glasnost“ et „perestrojka“) totum orbem commutaverint. Sed in Russia  multis invisus est, quod Unioni Sovieticae funus paraverit. Qua de causa Gorbatschow natalem suum Londinii, procul a patria, celebravit.

In Russia etiam nunc inter rerum scriptores et rerum politicarum peritos maxima est dissensio, quantum Gorbatschow re vera valuerit. Cum alii sentiant eum “viam libertatis patefecisse”, alii eum “proditorem atque eversorem” appellant, cuius vitiis erroribusque Unio Sovietica interierit.

Scripsit Volfgangus Austriacus