Bolivia et folia cocainica

Renatus (René) Sanabria, dux emeritus (rude donatus) Bolivianus, qui ad commercium stupefactivorum illegitimum coercendum praefectus a Praeside Evo Morales creatus erat, et nunc assessoris munere fungebatur in Centro Informationum pro Intellegentia, in Miamia arreptus est, quod cocainum ex Bolivia per Aricam, portum Chiliensem, in Statum Unitos transvectionem curaverit venumque dederit; quae nunc quidem adhuc vestigantur. Sanabria negat id fecisse et se insontem affirmat.

Notum est in Bolivia folia ex arbore cocainica ab incolis indigenis perantiquo more coli et diuturne masticari ut succum guttatim sorbillent; ex quo fit ut harum plantarum agros amplos ubique habent.

Praeses Evus Morales ancipitem politicam de hac re gerit, nam partim concivibus suis, qui cocaino utuntur, usque ab eo tempore, quo praesidentiam postulaverat, haud secreto favet; partim convocatus est ab aliis nationibus ut det operam ne stupefactivorum mercatores proposita perficiant.

Praeses atque narcotransductoribus bellum dicit indixisse atque simul foliorum cocainicorum valorem (usumque) cupit restaurare (foliorum, non stupefactivorum, quae ex eo depromuntur). Ambo vero eodem tempore non facile obtineri possunt.

Scripsit Paulus Kangiser