Annus
2 0 1 1


Exercitus Libycus indutias indicit

Exercitus Libycus indutias indicit

Incursiones a copiis internationalibus in Libyam factas efficaces esse apparet: nam exercitus Libycus indutias abhinc conservare iussus esse dicitur.

Ban Ki-Moon, secretarius generalis Nationum Unitarum, vesperi dixit se sperare Libyam indutias servaturam. At Britanni de indutiis nuntiatis dubitant: sua non interesse, quid Gaddafi dixerit, sed quid fecerit. Nam indutias Veneris die indictas paucis horis post ruptas esse.

Incursionibus aereis incipientibus gubernator sectatores suos in castra Bab al-Azizia et in aeroportum Tripolitanum congregaverat, ut iis veluti scuto humano uteretur. Aischa, filia tyranni, ad multitudinem versa patrem suum praedicans „nil nisi deus, Libya, Gaddafi“, clamavit; „populus vult Mahumetum, ducem suum.“ Cuius filius Saif al-Islam seditiosis maledixit: eos esse praedones ac terroristas. Post meridiem in televisione nuntiatum est unam fere millionem Libyum nunc armis instructum iri.

Interim et Russia et Civitates sociae Arabicae incursiones copiarum internationalium reprehenderunt: Amr Mussa dixit sua interesse cives servari, non plures cives perire. Civitates sociae Arabicae septimana superiore interdictum volandi poposcerant. Tamen Mussa vituperavit incursiones ad propositum , de quo convenerat, non pertinere.

Gaddafi interim „equitibus militiae sacrae addictis“ et „novis Nazistis“ bellum longissimum minatus est. «Totus populus in armis est», inquit, «victoria certa est. Nihil timemus neque ex pugna nos recipiemus, nam terram nostram nostramque dignitatem defendimus.» regimina autem Gallorum, Britannorum, Americanorum peritura, sicut Hitler et Mussolini perissent.

Scripsit Volfgangus Austriacus



Retro ad:

Novissima editio
Summum paginae